Um félagið

MS-félag Íslands er hagsmunafélag einstaklinga með MS, stofnað 1968. Félagið hvetur einstaklinga með MS-sjúkdóminn, aðstandendur og aðra áhugasama til að skrá sig í félagið og njóta þannig góðs af því sem félagið hefur upp á að bjóða. Sjá nánar um félagið hér til hliðar.

mslogo

Markmið félagsins er að vinna að velferð þeirra sem haldnir eru MS-sjúkdómnum með því að veita þeim og aðstandendum þeirra stuðning og stuðla að öflugri félags- og fræðslustarfsemi. Félagið er málsvari félagsmanna gagnvart hinu opinbera og öðrum aðilum.

MS-félagið er til húsa að Sléttuvegi 5 í Reykjavík. Skrifstofan er opin virka daga frá kl. 10-15. Sími er 568 8620. Netfang félagsins er msfelag@msfelag.is, vefsíðan www.msfelag.is og fésbókarsíðan MS-félag Íslands.

Félagið er mjög metnaðarfullt þegar kemur að fræðslu og gefur út ýmislegt fræðsluefni. Það stendur fyrir fyrirlestrum og námskeiðum árið um kring og eru námskeiðslýsingar að finna á vefsíðu. Félagið gefur út tímaritið MeginStoð tvisvar á ári og að auki er að finna fréttir, upplýsingar og fræðsluefni á vefsíðunni og fésbókarsíðunni. Nokkrir hópar hafa myndað sjálfstæða hópa á fésbókinni.

Boðið er upp á viðtal við félagsráðgjafa í síma eða á skrifstofu. Einnig er hægt að óska eftir viðtali við fulltrúa úr viðtalshópi fræðslunefndar félagsins, sem í eru einstaklingar sem hafa áralanga reynslu og víðtæka þekkingu á MS-sjúkdómnum. Slík viðtöl gagnast sérstaklega vel nýgreindum einstaklingum og aðstandendum þeirra. 

Félagið er með tveggja herbergja íbúð til skammtíma útleigu að Sléttuvegi 9. Íbúðin er sniðin að þörfum fatlaðra og geta fjórir gist í einu. Íbúðin er vel nýtt af fólki með MS og aðstandendum þeirra utan af landsbyggðinni sem eiga leið til höfuðborgarinnar.

Víða um land hittast hópar einstaklinga með MS að jafnaði mánaðarlega yfir árið, ekki eingöngu til að tala um sjúkdóminn heldur einnig til að eiga skemmtilega stund saman.

Sjá nánar um þjónustu félagsins hér

 

Gróskumikinn rekstur félagsins er aðallega að þakka sjálfboðavinnu, styrkjum og gjafmildi samfélagsins því félagsgjaldi er haldið í lágmarki og opinberir styrkir litlir. Hægt er að styrkja félagið á margvíslegan hátt, sjá nánar hér.