MS-blaðið, 2. tbl. 2022 er komið út

 

Segja má að áhersla sé á líf án takmarkana í þessu nýjasta tölublaði MS-blaðsins, jafnt í opnuviðtalinu sem og frásögnum MS-kvenna af fararskjótum, ferðalagi með hvíldarinnlögn á hjúkrunarheimili og heimsókn í náttúruperluna Víðgelmi.

Ingveldur Jónsdóttir hefur verið virk í starfi MS-félagsins sem og ÖBÍ og eru aðgengismál henni sérlega hugleikin. Ingveldur segir að í nútímasamfélagi þar sem aðgengismál eru í lagi sé ekkert því til fyrirstöðu að ferðast og fara um allt í hjólastól. Víða er þó pottur brotinn hér á landi, en Ingveldur hefur ekki látið hjólastólinn stoppa sig í að ferðast heima og erlendis og lifa lífinu til fulls án takmarkana.

Íris Dröfn Magnúsdóttir fór fyrir hönd félagsins á ársfund ungliðahóps evrópusamtaka MS-félaga sem haldinn var í Palanga í Litháen nú í haust. Þessi viðburður var einkum hugsaður til að mynda tengsl milli ungra einstaklinga með MS, bera saman reynslusögur og heyra af aðstæðum fólks í hinum ýmsu löndum Evrópu.  

Hjördís Ýrr Skúladóttir fjallar um fararskjóta fyrir alla og hjólagleði sem félagið efndi til á sólríkum síðsumars degi. 

Bergþóra Bergsdóttir segir frá 9 daga ferð sinni um N og NA-land í ágúst sl. en hún naut hvíldarinnlagnar á hjúkrunarheimilinu Dalbæ á Dalvík og notaði tækifærið og keyrði um einstaklega fallega náttúru í félagsskap æskuvinkonu sinnar og skátasystur.

Dagbjört Anna Gunnarsdóttir segir frá heimsókn sinni í náttúruperluna Víðgelmi, en þar eru komnir stigar og pallar nánast alla leið sem auðveldar aðgengi fyrir gangandi fólk.

Fastir liðir eru á sínum stað, formannspistill, verðlaunakrossgáta, upplýsingar um þjónustu, viðburði og starfið framundan ofl.

Við sendum ritnefnd kærar þakkir fyrir góð störf.

 

MS blaðið á rafrænu formi

  

Efnisyfirlit:

  • Formannspistill
  • Ungt fólk með MS
  • Skellur
  • Fararskjótar fyrir alla
  • Ísferð norður í land
  • "Stundum eru hindranirnar í kollinum á manni sjálfum"
  • Náttúruperlan Víðgelmir heimsótt
  • Verðlaunakrossgáta

 BÓ